1.      Ndryshime në ligjin dhe Udhëzimet “Për Tatimin mbi të Ardhurat”, të ndryshuar.

a.       Është zgjatur periudha e përfitimit të statusit special për strukturat akomoduese “Hotel/Resort me katër dhe pesë yje” deri në dhjetor 2026. Gjithashtu, afati maksimal për nisjen e aktivitetit ekonomik pas marrjes së statusit special është shtyrë në 5 vjet.

b.      Përkufizime të qarta të termave “honorar”, “dividend” dhe “dividend i ndërmjetëm”.

Po ashtu ky udhëzim ka sjell dhe ndryshime në disa nene të tatimit në burim/të ardhurat personale, që paraqiten si më poshtë:

Ndryshimet në Tatimin në Burim

• Tatimi për jorezidentët: Hiqet parimi i përgjithshëm i tatimit në burim në mungesë të klauzolave specifike në marrëveshjet për shmangien e tatimit të dyfishtë.
• Tatimi për agjencitë e huaja të punësimit: Nëse agjencia nuk ka seli të përhershme në vend, 20% e shumës totale të kostos së punës nuk do të tatohet në Shqipëri. Tatimi do të zbatohet vetëm në shtetin ku është regjistruar agjencia, sipas marrëveshjeve për shmangien e tatimit të dyfishtë.
• Detyrimi për certifikatën e rezidencës: Agjentët tatimorë duhet të kërkojnë dhe të ruajnë certifikatën e rezidencës së përfituesit të të ardhurave vetëm kur norma tatimore e aplikuar ndryshon nga normat standarde të ligjit për tatimin mbi të ardhurat.

Ndryshimet në Tatimin mbi të Ardhurat Personale

• Tatimi për të vetëpunësuarit: Të ardhurat bruto të arkëtuara zëvendësohen me të ardhurat e fituara (përfshirë të faturuarat) si bazë për llogaritjen e tatimit.
• Normat e tatimit mbi të ardhurat: Tatimi për të vetëpunësuarit do të llogaritet sipas normave të tatimit mbi të ardhurat nga punësimi, duke eliminuar referencën ndaj tatimit mbi pagën.
• Deklarimi tatimor: Të vetëpunësuarit duhet të plotësojnë rubrikën e të ardhurave nga punësimi, jo atë të të ardhurave nga biznesi.
• Tatimi mbi qiranë: Personat fizikë që ushtrojnë aktivitet në pronën e tyre ose të një familjari nuk i nënshtrohen tatimit mbi qiranë, me kusht që të jenë në të njëjtën certifikatë familjare.
• Përjashtime nga tatimi mbi të ardhurat e korporatave: Shoqëritë e thjeshta dhe disa entitete publike (p.sh., Banka e Shqipërisë, Autoriteti i Mbikëqyrjes Financiare) nuk janë të detyruara të dorëzojnë deklaratën tatimore dhe pasqyrat financiare. Entitetet e përjashtuara duhet të provojnë këtë përjashtim me dokumentacion nga Drejtoria Rajonale Tatimore.
• Lehtësim për mikronjësitë ekonomike: Subjektet me qarkullim vjetor nën 5 milionë lekë do të mbajnë një dokumentacion të thjeshtuar sipas Standardit 15 për kontabilitetin.
• Metoda e përllogaritjes së tatimit mbi fitimin: Vlerësimi i detyrimit për pagesën e kësteve mujore do të bëhet duke përdorur metodën proporcionale të qarkullimit vjetor.

2.     Ndryshime në Ligjin dhe Udhëzimin “Për Tatimin Mbi Vlerën e Shtuar”.

Eksporti i shërbimeve: Marrësi (person i tatueshëm i huaj) nuk është i detyruar të jetë i regjistruar për TVSH për t'u cilësuar si i tillë. Në vend të kësaj, ai duhet vetëm të provojë me një vërtetim nga autoritetet tatimore të vendit të tij se është një biznes i regjistruar dhe ushtron veprimtari ekonomike.

Furnizimi i mallrave dhe shërbimeve për projekte të financuara nga donacione ose grante trajtohet si eksport dhe TVSH do jetë 0%. Për këtë, projektet duhet të regjistrohen në Agjencinë Shtetërore të Programimit Strategjik dhe Koordinimit të Ndihmës, duke marrë një Kod Unik të Identifikimit të Projektit, i cili përdoret për faturat dhe dokumentacionin tatimor.

Procedurat e regjistrimit janë thjeshtuar:

• Agjencia shqyrton aplikimet brenda 10 ditëve pune dhe njofton për mangësitë brenda 5 ditëve.
• Pas regjistrimit, certifikata dërgohet në Tatime dhe Dogana për trajtim fiskal të projektit.
• Projektet regjistrohen edhe në Drejtorinë Rajonale Tatimore (DRT), e cila lëshon certifikatën për furnizim të barasvlershëm me eksportet.

Për kontraktorët:

• Nëse nuk janë të regjistruar për TVSH, pajisen me certifikatë për blerje pa TVSH.
• Nëse janë të regjistruar, përfitojnë zbritje dhe rimbursim të TVSH-së.

Importet për projektet e financuara nga donatorët përjashtohen nga TVSH pas autorizimit nga Doganat, duke paraqitur certifikatat e nevojshme.

Monitorimi i projekteve forcohet, duke kërkuar raportime të detajuara nga Tatimet dhe Doganat për të garantuar që TVSH 0% zbatohet vetëm për furnizimet e ligjshme.

TVSH-ja e paguar para regjistrimit mund të rimbursohet brenda 30 ditëve, pa analizë risku apo kontroll tatimor paraprak.

Së fundmi, Neni 63/2 mbi përjashtimin nga TVSH për projektet e financuara nga BE shfuqizohet.

Për më shumë informacione mos hezitoni të na kontaktoni në: info@ebinvest.al